Dank Herrn Müller-Abbass berichten wir von der WM 2022:
Pedifollicum certamen orbis terrarum in regno Qatario finitum
Triumphus Argentinae - Messi, dux gregis atque vir magicus
Galli summa cum acerbitate domum redeuntes
Maximum spectaculum mundi pedifollicum in paeninsula Arabica finitum est. In pugna memorabili Argentini fortissimi magno cum labore Gallos superaverunt. Intra duas horas magnum certamen decerni non poterat, nam utrique gregi contigit ternos ictus in portam inimicam ferre. Denique victores ita inventi sunt, ut et Argentinis et Gallis liceret quinquies sine ullo impedimento a puncto Elfmeter appellato follem in portam inimicam mittere. In illo officio gerendo duo summi lusores Gallici nimium dubitaverunt et animo defecerunt: In inimicam portam follem non miserunt, sed ea res omnibus Argentinis prospere evenit. Nunc Messi iam diu vir summo ingenio nominatus, sed pluribus annis maior natu Olympum pedifollicum desideratum triumphans conscendit. Nonnulli sunt, qui illum lusorem pedifollicum omnium temporum optimum dicant.
Sed in Germania magna tristitia pedifollica est: Post tria certamina lusores Germanici a rectore excercendi Sarci ducti domum redierunt, nam una victoria illis satis non erat ad arenam optimorum sedecim gregum intrandam. Imprimis artem defendendi Germanicus grex demonstrabat nullam. Ii, qui Germanicis lusoribus favent, diu sperabant duos offensores bonos Germanicam miseriam clademque horribilem prohibere posse: alium Bremensem Comple-Urnam, alium Monacensem Musialam - sed frustra!